Српскиот претседател Александар Вучиќ синоќа изјави дека има идеја да организира голем глобален форум во Белград на кој ќе се соберат сите светски лидери и дека за тоа ќе бара поддршка од американскиот претседател Доналд Трамп, како и од рускиот претседател Владимир Путин.
„Ќе барам поддршка и од Доналд Џуниор и од Доналд Сениор Трамп, а ќе ја барам и поддршката од претседателот Путин – Имам идеја да создадам голем глобален форум со различни теми следната година што ќе се одржи во Белград“, рече Вучиќ на ТВ Информер, нагласувајќи дека првпат ја објавува оваа идеја.
Тој изјави дека добил покана од САД да учествува во Републиканскиот национален комитет на почетокот на мај и нагласи дека посетата, меѓу другото, ќе ја искористи за да побара поддршка од Трампови за глобалниот форум.
Вучиќ го изјави ова при најавата на посетата на САД, при која очекува да има можност да се сретне со претседателот Доналд Трамп најмалку два-три пати во два-три дена. На прашањето на новинарите дека тоа значи дека за седум дена ќе се сретне и со Трамп и со рускиот претседател Владимир Путин, Вучиќ рече дека тоа е можно.
Тој додаде дека се уште нема конечна потврда за средба со Трамп, но дека има потврда за средба со сите важни републиканци. Истакна дека мисли оти Белград е единственото место што би можело да биде домаќин на Путин, Трамп, Макрон, Мелони, Мерц и многу други на форум на политички теми следната година.
„Значи, никој во светот не може да го направи тоа во моментов и ќе се обидам да ги замолам големите глави да ми помогнат да го организирам тој самит“, рече Вучиќ на ТВ Информер.