Српскиот претседател Александар Вучиќ синоќа изјави дека државата нема да дозволи ниту еден витален објект да биде блокиран и работата да биде запрена.
„Нема да дозволиме ниту еден од виталните објекти да биде запрен. Ако го блокирате Костолац, аеродромот, Газела, никогаш повеќе нема да го направите тоа. Сите ќе бидете уапсени, сите, доста со ваквото малтретирање“, се закани Вучиќ, пренесе Nova.rs.
Ве потсетуваме дека синоќа, поради третата ноќ од блокадата, низ цела Србија беа регистрирани голем број инциденти.
Граѓаните и студентите не се откажуваат од исполнување на своите барања.
Во саботата во Белград се одржа голем студентски и граѓански протест наречен „Се гледаме на Видовден“.
По завршувањето на протестот, избувна судир меѓу полицијата и граѓаните.
Во неделата, по наредба на Вишото јавно обвинителство во Белград, во заедничка акција со припадници на Министерството за внатрешни работи на Република Србија и БИА, беше извршено апсење.
Шест лица беа уапсени, а српските медиуми објавија дека станува збор за студенти.