Шефот на делегацијата на Европската Унија во Белград, Андреас фон Бекерат, денес изјави дека ако Србија навистина сака да докаже дека пристапувањето кон Унијата е нејзина стратешка цел, мора да го покаже тоа преку опипливи резултати. Тој потсети на голем број обврски што официјален Белград сè уште треба да ги исполни.
Фон Бекерат му го предаде на српскиот претседател Александар Вучиќ најновиот извештај на Европската комисија за напредокот на земјите кандидати и потенцијални кандидати. На заедничката прес-конференција, тој рече дека Србија „продолжува да го прогласува членството во ЕУ како стратешка цел и ЕУ го сфаќа тоа сериозно“.
„Сега е време да се поткрепи ова со конкретни акции. Властите во Србија мора јасно да го искажат овој стратешки избор и да избегнат антиевропска реторика. Европската Унија очекува попроактивен и пообјективен начин на комуникација за процесот на пристапување во ЕУ. Иднината на Србија е во ЕУ и ова треба јасно да се искаже, не само со зборови, туку и со дела“, нагласи шефот на Мисијата на ЕУ.
Србија ги започна преговорите за пристапување во 2014 година, а во текот на повеќе од една деценија, отвори само 22 поглавја, од кои само две се привремено затворени. Последниот кластер беше лансиран во декември 2021 година, и оттогаш нема видлив напредок. Покрај тоа, Србија е единствената земја-кандидатка која не ја усогласила својата надворешна и безбедносна политика со ЕУ, особено кога станува збор за односите со Русија.
Фон Бекерат рече дека од Србија се очекува да го надмине застојот во областите на судството, владеењето на правото, заштитата на човековите права и итно да ги промени негативните трендови кога станува збор за слободата на изразување и ерозијата на академските слободи. Сето ова, додаде тој, вклучува многу поголемо усогласување со заедничката надворешна политика на Унијата.
„Заклучокот е дека Србија мора да ги надмине поделбите, да ја обнови довербата меѓу политичките и граѓанските актери, мора да видиме конкретен, опиплив напредок во владеењето на правото, изборната рамка и слободата на медиумите“, рече Фон Бекерат, додавајќи дека „овие реформи не се лесни, но се неопходни и вредат за секој напор“.
Вучиќ: Ќе дојде некој пошармантен од мене
Шефот на Делегацијата на ЕУ истакна дека Унијата е подготвена да продолжи да ја поддржува Србија во демократските и институционалните реформи, но додаде и: „Сопственик на тој процес е Србија и за тоа ќе се одлучи тука“.
Претседателот на Србија, Александар Вучиќ, повтори дека членството во ЕУ останува стратешка цел на земјата.
„Вие во ЕУ не мора да се грижите, мојот мандат наскоро ќе заврши и ќе дојде некој пошармантен. Нашиот стратешки пат е европскиот пат, до изборите. Не знам каде на друго место би оделе. Ние сме во потешка позиција од другите. Ќе го земеме предвид извештајот (на Европската комисија) на многу сериозен начин, ќе видиме што можеме да исправиме“, рече српскиот претседател.
Кога беше прашан за можна промена на политиката кон санкциите против Русија по три и пол години, тој потсети на одлуките на Советот за национална безбедност донесени на почетокот на војната во Украина.
„И во Советот за национална безбедност и во владата на Србија, луѓето можат да ја променат таа одлука. Владата има овластување да ја промени таа одлука“, рече Вучиќ.
Зборувајќи за санкциите на САД врз Нафтената индустрија на Србија (НИС), која е во мнозинска сопственост на Русија, тој рече дека е „помалку песимист отколку што беше“ и дека се надева дека „ситуацијата во врска со НИС ќе биде решена, добро и поволно за Србија“.