Српскиот претседател Александар Вучиќ денеска во Баку, каде што учествува на COP29, изјави дека постојат два услови за борба против климатските промени, а тоа е да се стави крај на војната во Украина и да се изнајдат нови начини за финансирање, без да се доведуваат земјите во должничко ропство.
По обраќањето на Конференцијата на ОН за климатски промени, тој им рече на новинарите дека во сегашните геополитички околности не може да се зборува за овој проблем, бидејќи секој ги зголемува трошоците на различни начини – директно, индиректно, за одбранбените индустрии и за оружје.
„Светот се движи по работ на бездната, се закануваат еден на друг и ако само еден отиде предалеку – тоа е крајот“, предупреди Вучиќ.
Тој додаде дека стравот и нервозата не можат да се сокријат, наведувајќи дека ваквото сценарио не може да не се одрази на Србија.
Вучиќ рече дека со победата на Доналд Трамп на американските избори се појавила трошка надеж, но дека ќе биде тешко да се направи нешто околу тоа, бидејќи не е лесно.
Зборувајќи за енергијата, нафтата и гасот, Вучиќ рече дека по победата на Трамп цената на нафтата на светскиот пазар паднала, но цената на гасот, како што рече, „отишла до небо“ – 485 долари за 1.000 кубни метри, додека за Србија е цена 325.
„Суштината на мојот говор е дека јавниот долг расте во светот и ќе биде околу 100 отсто, на ниво на ЕУ, повеќе од 90 отсто во однос на БДП. Во Србија 46,4 отсто и сме во многу подобра состојба од светот и Европа, но потребни се нови инструменти за финансирање, без да се потпираат на јавниот долг, а ММФ и Светата банка мора да најдат нови модели на финансирање, ако не го сторат тоа, сите ќе бидеме во неволја“.
За тоа, како што истакна, потребни се нови инвестиции и опрема. Вучиќ додаде дека никој во светот не знае како да одговори што ќе се прави во областа на електричната енергија, бидејќи за три до четири години САД ќе го прекинат извозот на течен нафтен гас.
„Затоа што ќе им треба поради зголемената потрошувачка, за потребите на вештачката енергија и електричните полначи. Тогаш ние ќе застанеме во ред, а сите што го забранија рускиот гас ќе застанат пред Москва, ќе стојат и ќе бараат да им го дадат гасот назад. Мораме да ги решиме проблемите што е можно поскоро“, истакна Вучиќ.
Тој рече дека потрошувачката на струја се зголемува, поради што се градат гасни електрани.
„До пред неколку години не ни размислувавме за гасните централи во Србија, бидејќи ни се скапи, ни беше поефтино да користиме јаглен, а сега решението се гасните централи“, рече Вучиќ.
Според него, во Србија струјата повеќе се троши во лето отколку во зима, така што нема разлика во потребата од струја.
Вучиќ рече и дека во наредниот период се очекуваат важни посети на Србија и дека во понеделник во дводневна посета ќе пристигне и претседателот на Казахстан, Касим Зомарт Токаев.
Вучиќ, кој претходно денеска се сретна со претседателот на Белорусија Александар Лукашенко во Баку, изјави дека Мешовитиот комитет на Србија и Белорусија донел одлука за натамошно унапредување на економската соработка и политичките односи меѓу двете земји.