Вицепремиерот на Србија, Александар Вулин денеска изјави дека, како што наведе, водачите на протестот за соборување на Александар Вучиќ не успеале да изнесат доволен број луѓе на улица за да почнат да го соборуваат Вучиќ, но успеале да покажат како мислеле да го соборат.
Вулин, коментирајќи го синоќешниот протест во Белград против најавата за ископ на литиум, во соопштение истакна дека блокадите на мостовите, железничките пруги и патишта немаат врска со екологија, туку имаат врска со малтретирање на граѓаните и „прирачници за спроведување обоени револуции“.
„Секој има право да ги изрази своите политички убедувања, но никој нема право да ги малтретира граѓаните и да ја спречи нивната слобода на движење и да го загрозува нивното здравје и имот“, рече Вулин.
„Државата е должна да одговори на секој што е загрижен за зачувување на животната средина, но и државата е должна да одговори на секое малтретирање на граѓаните, на секое спречување на слободата на движење и на секој обид, вклучително и најава за насилна смена на власта Знаевме што планирате, спречивме да направите Мајдан, не се обидувајте повеќе“, рече вицепремиерот на Србија, Александар Вулин, коментирајќи го вчерашниот, како што рече, „обид“ да се урне власта на белградските улици, која беше организирана и подготвена од „НАТО опозицијата со помош на одредени странски служби“.