Од СДСМ се огласија со реакција на вчерашниот говор на премиерот Христијан Мицкоски по повод свечената академија во Македонската филхармонија и 33-годишнината од независноста на Македонија. Според партијата, протоколарните пораки за обединување, немаат никаква врска со реалноста која ни ја сервира ВМРО-ДПМНЕ и политиките кои ги практикува во овие два месеци.
-Повиците за декриминализација на опозицијата се очаен обид да се покријат сопствените скандали во кои тоне Мицкоски. Освен партиската говорница за сеење лаги и измислени скандали против опозицијата, Мицкоски не успеа да докаже никаква криминализација. Но докажа дека тој ја криминализира, партизира и злоупотребува државата секој ден, истакнуваат од СДСМ.
Од партијата на Венко Филипче тврдат дека пораките на премиерот се „шупливи со кои сака да глуми конструктивност“.
-ВМРО-ДПМНЕ нема ниту план, ниту конкретен предлог за обединување, тоа единствено им е потребно на говорниците. Националното единство му е напишано во секој говор за да го прикрива семето на поделбите и омразата кое го сее.
Власта мора да даде конкретен пример со дела и да биде подготвена да прифати проширување на областите за разговор. Да разговараме и за утврдување принципи за подобрување на состојбите во здравството, за положбата на работниците, за младите.
Национален консензус за главните прашања сметаме дека е потребен. И во минатото СДСМ повеќепати ја повикуваше тогашната опозицијата за најважните прашања да застанеме заедно, стои меѓу другото во соопштението на најголемата опозициска партија.
Правда и правна држава, бескомпромисна борба со криминалот и корупцијата, достоинствен живот за сите граѓани – порача Мицкоски по повод одбележувањето на Денот на независноста 8 Септември – кога, како што тој рече на светот јасно му пренесовме дека татковината не се сака затоа што е голема, туку затоа што е наша.
Премиерот ја подвлече важноста на националните интереси, нагласувајќи дека тие ќе бидат брани по секоја цена. Исполнување на стратешката цел – членство во ЕУ за која вели подготвен е во секое време да разговара, но не и за се да преговара.
-Исчистете се од криминалот во своите редови и реформирајте се. Прифатете го ова што го нудам како платформа. Сите партии и чинители да седнеме на заедничка маса и да изградиме македонска платформа за делување, за иднината и наредната доба. Од нас зависи, во наши раце е иднината и ние можеме. Во оваа прилика сакам да се обратам и до опозицијата која тоне во безидејност и конструктивност. Ве повикувам да престанете со деструктивни игри. Дојде време да завртите нова страница во која ќе бидете активен учесник во градењето на заедничката држава. Силна опозиција е од суштинско значење, додаде меѓу другото, Мицкоски во своето обраќање пред присутните во салата на Македонската филхармонија.