Заев: Само електронски попис нема да биде доволно, ќе биде спроведен со нова методологија

„Пописот 2021 во Северна Македонија ќе се спроведе со нова методологијата која за првпат ќе се применува кај нас и која во еден дел вклучува и електронски попис. Овој комбиниран модел е познат во светската пракса и е во согласност со препораките на ОН и Евростат“, објави денес премиерот Зоран Заев.

Според него, со вкрстување на податоците што ќе се добиваат од електронските прашалници на терен со податоците од базите коишто веќе постојат во државата, како, на пример, оние на МВР и на Фондот за здравство, ќе имаме целосен преглед за податоците кои се неопходни, но, не се опфатени со електронските бази.

„Тоа значи дека електронскиот попис веќе е дел од севкупната методологија на статистичката операција – Попис 2021, кој заедно со теренското попишување ќе обезбеди заокружен процес за целосна успешност на најважната статистичка операција како основа за идните развојни програми на државата.

Само електронски попис нема да е доволно за да имаме комплетни податоци какви што се потребни според Евростат и меѓународните стандарди, затоа што одреден дел од податоците од електронските бази не ја даваат комплетната и прецизна слика.

На пример, само со електронски попис не можат да се добијат сите потребни податоци за нерезидентните граѓани, односно граѓаните кои се во странство повеќе од една година, а кои се опфаќаат со Пописот за 2021 година, како што ниту една база на податоци не ја дава комплетната слика за видот, стандардите и бројот на живеалиштата на нашите граѓани, која може многу да помогне во креирањето на социјалните политики“, потенцира Заев, додавајќи дека на нашата држава ѝ требаат како неопходни сите податоци што ќе се добијат од пописот.

„Пописот не е само операција која треба да даде слика за етничката состојба во земјата, туку опфаќа многу сегменти, факти, податоци, бази од кои може да се согледаат развојот, стагнацијата или уназадувањето на едно општество.

Државниот завод за статистика ги има сите професионални и стручни капацитети, сѐ што е потребно е да ги следиме нивните насоки, да дадеме максимум поддршка и на крајот да имаме заеднички резултат – успешен“, заклучува премиерот.

Во меѓувреме, опозицијата бара владата да се откаже од законот со кој, според нив, се фалсификува пописот. Партијата на Мицкоски не се откажува од собирањето потписи, па дури и најавува дека во тоа ќе се вклучи и дијаспората.

„Зоран Заев и власта да се откажат од насилниот попис кој ќе биде фалсификуван, чии бројки се познати однапред бидејќи се договориле со коалициските партнери. Да се направи електронски попис што сите ќе го поддржиме. ВМРО-ДПМНЕ ќе започне со собирање потписи за укинување на законот. Ако власта ја наруши волјата на граѓаните, ќе повикаме на масовни потписи на граѓаните и македонската дијаспора“

Повиците на власта до опозицијата да го поддржи пописот доаѓаат еден ден откако претседателот и премиерот се состанаа со градоначалниците на сите општини за да ги запознаат со потребата од логистичка помош на локалната самоуправа кон Државниот завод за статистика. На координативниот состанок немаше претставници на опозицијата освен градоначалниците со кои во моментов раководи опозицијата. Пописот треба да се спроведе од 1 до 21 април, но методологијата сè уште не е објавена. Заводот за статистика тоа го најави за следнава недела.