„Имаме многу јасен став. Сакам да потенцирам дека тоа нема никаква врска со изборите. Ако постигнеме договор пет дена пред изборите, Бугарија може да ја одобри Рамката за преговори на РС Македонија за почеток на претпристапните преговори“.
Ова го изјави вицепремиерот и министер за надворешни работи Екатерина Захариева за бугарска „Нова ТВ“, цитирана од БГНЕС. Таа истакна дека главното прашање во спорот е поврзано со спроведувањето на Договорот за добрососедство и пријателство, кој беше потпишан во август 2017 година.
„Најголемата манипулација што доаѓа од Скопје е дека им го ускратуваме правото на самоопределување. Ако не им негираме на бугарските граѓани да самоопределат, што останува за странските граѓани“, изјави Захариева.
„Имаме интерес РС Македонија да започне преговори, но не можеме да замижуваме на заштитата на националните интереси. Имаме многу точки со неисполнување на Договорот“, потенцираше вицепремиерката.
Захариева уште еднаш повика да се намалат емоциите и да не се зборува преку медиуми.
„Ако колегите од Северна Македонија сакаат да се приклучат на семејство, нема начин да ги мобилизираат сите сили да оцрнат еден од членовите“, рече Захариева за земјава.