Пратеникот од редовите на ДУИ, Арбен Зибери вели дека сите протоколи биле запазени при спорведувањето и гласањето на пратениците кои беа позитивни и дојдоа во Собрание.
-И јас гласав од истата просторија од која во неделата гласаа и моите колеги, според сите запишани и пропишани правила од соодветната Комисија за заразни болести. Беа запазени сите протоколи и тогаш и сега иако јас кога гласав се уште немав решение за изолација бидејќи уште не бев тестиран, но имав благи симптоми кои укаживаа дека можеби имам Ковид, и поради колегијалност го известив претседателот на Собранието дека не би било убаво додека не се тестирам да работам и да гласам од големата сала. И трудовата инпекција излезе со оценка дека за време на гласањето во неделата беа запазени сите протоколи. Сакам да напоменам дека ова што го прави опозицијата навистина е многу нечовечки, се гледа дека нивната цел е да ја блокираат работата на Собранието, нив ништо друго не ги интересира. Ние како парламентарно мнозинство, поточно претседателот на Собранието уште првиот ден кога се формираше ова мнозинство предложи да може да работиме онлајн за да се избегнат ваквите ситуации, и тогаш, и тој предлог опозицијата не го прифати и го блокираше, вели за Утрински брифинг пратеникот Зибери.