Нејт Венс, поранешен американски маринец и братучед на американскиот потпретседател Џеј Ди Венс, ја бранел Украина од 2022 година до јануари 2025 година како член на 1-от моторизиран баталјон наречен „Волците на Да Винчи“. Тој тврди дека е разочаран од ставот на неговиот братучед кон Украина.
„Само затоа што сме семејство не значи дека ќе прифатам да ги убиете моите другари“, рече Нејт во интервју за „Фигаро“. Неговата изјава доаѓа во време кога американско-украинските односи се на исклучително ниско ниво.
Американскиот претседател Доналд Трамп минатата недела го суспендираше споделувањето разузнавачки информации и воената помош за Киев. Суспензијата уследи по расправија во Овалната соба. Нејт истакна дека е разочаран од начинот на кој неговиот братучед се однесувал со Зеленски за време на состанокот.
„Никогаш не се обиде да дознае повеќе“
„Кога (Џ.Д.Венс) ја критикуваше помошта за Украина, мислев дека тоа е поради тоа што треба да го привлече своето гласачко тело, дека тоа е дел од политичката игра. „Но, она што му го направија на Зеленски беше апсолутно нечесна заседа“, рече тој.
Тој предупреди дека ставовите на Џ.Д. за Украина и недовербата кон Зеленски се неоправдани.
„Бев на линијата на фронтот. Можев да му ја кажам вистината, без преправање, без личен интерес. Никогаш не се обиде да дознае повеќе”, се пожали тој. Додаде дека неколку пати безуспешно се обидел да стапи во контакт со својот братучед.
Нејт доброволно се пријави по целосната руска инвазија во 2022 година, но неодамна ги напушти украинските сили поради стравувањата дека ќе биде заробен од руската војска.
„Стана комплицирано да останам. Не можев да ризикувам да бидам заробен“, истакна тој.