Сензационалистички вести со денови кружат за сознанијата на тајните служби за коронавирусот. Дали е тоа уште една теорија на заговор?
Што навистина велат новите документи на тајните служби, се прашува „Дојче веле“.
Во извештајот на сојузите на тајните служби на петте најголеми земји што зборуваат англиски јазик (САД, Велика Британија, Канада, Австралија и Нов Зеланд, наречени „Five eyes“) се зборува за непознат вирус од лилјак од Кина, за кој биле спроведени истражувања во Вухан.
Извештајот за тајните служби е доставен до австралискиот весник „Дејли телеграф“. По неговото објавување, се зголемил бројот на статии за „вирусот создаден од маж во лабораторија во Вухан“. Покрај тоа, се вели дека светот изгубил драгоцено време во борбата против вирусот затоа што Кина ги криела информациите. Не само што американскиот претседател Доналд Трамп упати вакви обвинувања, туку за ова имаат пишувано и некои германски таблоиди. Дали е ова навистина гигантски скандал?
Нови гласови од САД
Како прво, најважното нешто: коронавирусот не беше создаден вештачки од човекот, ниту пак беше систематски пуштен во светот. Нема доказ во извештајот на тајните служби за глупости од ваков вид, за кои теоретичарите на заговор ширум светот поттикнуваат слични неодржливи тврдења, како за потеклото на вирусот ХИВ во 1980-тите.
Напротив, и американскиот директор на тајните служби, под кој се подредени сите 17 американски тајни служби, издаде соопштение за печатот во кое објаснува: како и повеќето научници, американските тајни служби немаат причина да претпоставуваат дека Ковид-19 е создаден од човек или генетски модифициран. Во исто време, американските тајни служби сè уште истражуваат дали вирусот им се пренел на луѓето од животните или како несреќен случај излегол од лабораторија во Вухан
Со оваа изјава, која беше објавена минатиот четврток од поранешниот американски амбасадор во Берлин, познат по неговите недипломатски изјави и кој е новиот координатор на тајните служби за Белата куќа, Ричард Гренел, американските тајни служби направија сензационален исклучок од правилото да не ги коментираат тековните настани.
Ова не е таен проект
Само неколку дена по оваа официјална објава, беше објавен напис во австралискиот „Сатердеј Телеграф“. Дури и овде, во извештајот, кој очигледно доаѓа од австралиската тајна служба „АСИС“, нема докази дека коронавирусот бил предизвикан од човек.
Несомнено, највозбудливиот аспект од извештајот на австралиската тајна служба, кој досега беше занемарен, е информацијаta за истражувањето на коронавирусот. Затоа што, скоро 15 години, пишува „Сатердеј Телеграф“, кинески тим виролози предводен од д-р Ши Зенгли, директор на Центарот за заразни болести на Институтот за вирологија во Вухан, истражувал коронавируси кои се појавуваат кај лилјаците. Постојат над 5.000 видови на такви вируси, од кои д-р Ши истражувал најмалку 50. Но, тоа не било кинески таен проект. На пример, тим научници соработувале со лабораторијата за здравјето на животните „Commonwealth Scientific and Industrial Research Organisation” (CSIRO), каде д-р Ши и неговиот соработник Пенг Џоу поминале неколку години таму. Универзитетот во Северна Каролина во САД бил партнер во истражувањето.
Целта на истражувањето било да се изолираат вирусите што се појавуваат кај лилјаците и да се провери дали тие можат да бидат пренесени на луѓето. Во ноември 2015 година, скоро точно четири години пред избувнувањето на сегашната пандемија, студија на д-р Ши од Универзитетот во Северна Каролина дошла до заклучок дека вирусите слични на САРС може да се пренесат од лилјак на човек и нема лек за тоа. Во 2019 година, преку нивната следна студија, се дошло до заклучок: „Многу е веројатно дека идните инфекции со коронавируси како САРС или МАРС ќе потекнуваат од лилјак и дека најверојатно ќе се појават во Кина“.