Француските лекари, наводно, го пријавиле првиот случај на пренесување на коронавирусот од мајка на дете во утробата.
Новороденото момче развило инфекција на мозокот само неколку дена по раѓањето, а состојбата се појавила откако вирусот ја преминал плацентата и го заразил во матката. Бебето сега полека се опоравува.
Бројни студии ги следат новороденчињата со ковид-19, но досега не може да се отфрли можноста бебињата да се заразат за време или набргу по раѓањето.
„За жал, во овој случај, не постои сомнеж за пренесување на вирусот преку плацентата. Ова не е вообичаен случај, но сега е јасно дека може да се случи”, рече Даниел Делука, педијатар во болница во Париз.
Мајката (23) била примена во болницата на 24 март во третото тримесечје со висока температура и силна кашлица. Тестот наскоро покажал дека таа е позитивна на коронавирусот.
Три дена по пристигнувањето во болницата, ултразвукот покажал дека е потребен итен царски рез. Бебето било веднаш изолирано во единицата за неонатална интензивна нега и интубирано.
Тестовите на крвта и течноста на бебето земени од белите дробови откриле присуство на коронавирус, но се отфрлија други вирусни, бактериски и габични инфекции. Широки тестови откриле дека вирусот од крвта на мајката се раширил во плацентата, каде што се размножувал и предизвикал воспаление кое се ширело кај бебето.
„Причината што не беше откриено порано е дека ви требаат многу примероци. Потребна ни е крв од мајка, новороденчето, крв од папочна врвца, плацентата, амниотска течност и тоа е многу тешко да се собере среде пандемија и вонредни состојби”, објасни Делука.
Тој додаде дека претходно имало сомнителни случаи, но никој немал можност да испита сè и да ја провери патологијата на плацентата, пренесува „Гардијан“.
Највисок степен на вирус е пронајден во плацентата, која е богата со истите рецептори пронајдени во белите дробови, и кои вирусот ги користи за да ги нападне човечките клетки.
Иако бебето првично се чинело здраво, третиот ден станало раздразливо и почнало лошо да јаде. Покажало невролошки симптоми поврзани со менингитис, а натамошно испитување открило знаци на глиоза, несакан ефект на невролошки повреди кои можат да доведат до лузни во мозокот.
Во времето кога се родило момчето, немало клинички упатства како да се лекуваат заразените бебиња. Лекарите ја сметале употребата на ремдесивир, антивирусен лек, но бидејќи бебето постепено се опоравувало без помош, одредени лекови не биле вклучени. Делука рече дека сега состојбата на бебето е „скоро нормална“.
„Лошата вест е дека во овој случај, фактот дека вирусот може да достигне до бебето и да предизвика симптоми. Добрата вест е дека на крајот, бебето се опорави. Клинички е добро”, рече тој.
На прашањето дали бремените жени треба да бидат особено внимателни во однос на социјалното растојание и миењето на рацете, за да се намали ризикот од инфекција, Делука рече дека станува збор за здравиот разум, без разлика дали сте бремени или не.