Неколку стотици врвни руски менаџери и водечки државни службеници се вакцинирани со експериментална вакцина против коронавирус од април досега. На политичката елита на Кремљ и беше дадена можност предвреме да се заштити од злобната зараза.
Според текстот во „Блумберг“, фактот дека се извршени експериментални вакцинации не е нелегално, но се чувало во тајност за да нема „гужва“ и прекумерен интерес, иако Блумберг се прашува кои биле критериумите за избор.
Најзагрозена земја
Русија е една од најзагрозените земји, бројот на заразени со ковид-19 веќе надмина 839 илјади, а за прв пат од април во Русија деновиве е забележан конечен пад на дневните заболени под шест илјади.
Сепак, веста дека оние што се избрани од кругот на Кремљ ја примиле вакцината, како што пишува „Блумберг“, крена многу прашина во Москва, а на прашањето на американската публикација дали е вакциниран и самиот претседател Владимир Путин или некој од најблискиот политички и деловен круг и администрација, од Кремљ не одговорија. Портпаролот на Путин, Дмитриј Песков, кој инаку ја совлада короната со својата сопруга, реши да молчи за одговорот на ова прашање.
Треба да се потсетиме дека неодамна беа упатени доста сериозни обвинувања против Русија дека се обидела да ги хакира истражувачките центри на Западот со цел да се добие увид во тоа до каде дошло истражувањето на вакцината против ковид-19 во најпознатите истражувачки институти. Русија негира сè.
Неосновани обвинувања
Руските медиуми исто така пишуваат дека „обвинувањата“ на Блумберг се неосновани, иако тие се однесуваат на неколку анонимни соговорници, врвни менаџери на водечки руски компании како Русал и Фосарг, кои признале дека ја примиле вакцината. Еден од тие соговорници рече дека нема никакви несакани ефекти, а некои признале дека имале треска и болки во мускулите во раните денови. Блумберг наведува дека и двете компании не одговориле на нивните истраги за вакцинирање на нивните водечки луѓе.
Патем, директорот на Националниот истражувачки центар „Гамалеј“, Александар Гуинцбург, изјави за руската агенција Интерфакс дека „не знае ништо за тоа“ и дека тоа е малку веројатно, а раководителот на Институтот за фармација на универзитетот Сехен, каде што се спроведува и истражување за вакцини Кирил Дмитријев вели дека неговото семејство ја добило експерименталната вакцина, дека истражувањето се одвива добро и дека втората фаза завршува на 3 август и дека после тоа ќе започне вообичаената трета, финална фаза, која освен Русија, ќе ја вклучи, се чини, и областа на Блискиот исток.
Заменик министерот за здравство на Русија, Алексеј Куниецов, изјави за агенцијата ТАСС дека истражувањето сè уште не е готово и истакна дека примената на вакцината во експерименталната фаза не е можна надвор од рамките на клиничкото испитување.
Во исто време, руските медиуми наведуваат дека последната група од 20 волонтери кои биле подложени на вакцинација е пуштена деновиве од болницата Бурденко, каде армијата спроведува тестови за вакцинирање.
Според руски извори, откако ќе се најде ефективна вакцина против коронавирус, најмалку 40 до 50 милиони Руси ќе треба да се вакцинираат.
Фаза на тестирање
Некои западни извори веруваат дека истражувањето на вакцините се „брза“ во Русија и дека тестовите се спроведуваат со „сомнителен метод“ само за да се реализираат амбициозните планови на претседателот Владимир Путин за „Русија да биде прва“.
Руските истражувачки институти работат со полна пареа, а во јули претставија охрабрувачки податоци според кои може да се направи ефикасна вакцина во втората половина на есента, која веќе може да се користи кај луѓето до крајот на годината. Тие во моментов се во фаза на тестирање на примати и волонтери.
Коронавирусот не пристигна во Русија од Кина, затоа што на почетокот на епидемијата, Русија реагираше многу ефикасно. Сепак, инфекцијата дојде од Запад и Блискиот исток, пред се од Италија, Шпанија, Франција, Германија и Обединетите Арапски Емирати.