Во својата канцеларија во црногорската престолнина Подгорица, Мило Ѓукановиќ има голем портрет на кралот Никола, првиот владетел на Црна Гора, кој бил на тронот 58 години, пишува италијанскиот весник „Република“, прашувајќи се дали после 30 години власт можеби дојде време и „Кралот Мило“ да абдицира.
Весникот наведува дека во Црна Гора се случило нешто што никогаш не е видено досега, дека Демократската партија на социјалистите на претседателот Мило Ѓукановиќ победила на парламентарните избори со тесен резултат, но дека по 30 години непрекинато владеење, нема мнозинство во парламентот за да продолжи да владее.
Со 35,06 проценти од гласовите, ДПС ќе може да смета на само 30 од 81 место во парламентот во Подгорица, додека опозицијата, како што пишува Република, постигнала историски резултат.
„За иднината на Црна Гора“, водечката опозициска коалиција доби 32,55 проценти од гласовите и 27 места, а добри резултати постигна и либералната и проевропска коалиција „Мирот е нашата нација“ – 12,53 проценти и зелените „Уре“ -5, 53 проценти.
Според италијанскиот дневен весник, тие заедно би имале 41 место, тесно мнозинство, но корисни за прекинување на односот на силите во малата балканска земја по три децении.
Говорејќи ноќта по гласањето, самиот Ѓукановиќ ја признал можноста неговата партија да го загубила парламентарното мнозинство, отворајќи го патот за институционална кохабитација помеѓу претседателството и владата од различни ориентации.
„Слободата пристигна. „По 30 години апсолутно владеење, тоа мораше да се случи“, коментирал Здравко Кривокапиќ, лидерот на „За иднината на Црна Гора“, кој е поддржан од Српската православна црква.
Религиозното прашање беше главна тема на изборната кампања откако парламентот го донесе законот во декември минатата година со кој и се дозволува на државата да ги конфискува земјиштата, манастирите и црквите на единствената канонски признаена, Српска православна црква, наведува весникот.