Денес се одбележува официјалниот почеток на најнеизвесната учебна година во историјата на хрватското образование. Ова е година во која секое индивидуално училиште во Хрватска ќе може да применува три модели на настава – училишна настава, мешана форма на настава што вклучува комбинација од посетување часови и онлајн-учење, и настава исклучиво преку Интернет.
Изборот помеѓу моделите што треба да се применуваат во секое училиште зависи единствено од епидемиолошката слика на секоја област во која се наоѓа училиштето и е договорен на ниво на директори и членови на локалните штабови. За првпат во историјата, учениците и наставниците во училиштата ќе носат маски, во добро подготвени училишта и бариери меѓу учениците и наставниците и ќе мора да се придржуваат до епидемиолошките мерки, вложувајќи заеднички напори за зачувување на здравјето на наставниците и на сите ученици во секоја образовна институција.
Бидејќи маските ќе бидат задолжителни за учениците и наставниците, министерот за образование Радован Фушс порачува дека Министерството не пропишало санкции бидејќи Хрватска не е полициска држава, но нагласи дека ученикот кој ќе одбива да носи маска ќе биде третиран како да ги прекршува правилата на однесување пропишани во училиштето, исто како да го уништува ѕидот на училиштето.
„Во тој случај или ќе се повикаат родителите или ќе се испрати дома ученикот или нешто слично. Директорот има можност да каже дека ја нарушуваат работната дисциплина. Оние наставници кои не можат да носат маски поради некоја причина, постојат алтернативни решенија, визири“, истакна министерот за образование.
Без оглед на тоа кој модел го избрале училиштата, ќе биде потребно доследно да се спроведуваат сите мерки и препораки за работа. Во случај на влошување или подобрување на епидемиолошката состојба на локално ниво, одлуката за затворање или отворање на образовна група или одделeние во одредено училиште во областа ја донесува директорот на институцијата во соработка со основачот и надлежното локално седиште.
Обврска на родителите е пред да го испратат своето дете во училиште да му измерат температура, и доколку таа е повишена треба веднаш да бидат известени и директорот на училиштето, како и матичниот лекар.