Силвио Берлускони, милијардер и поранешен премиер на Италија, почина вчера, оставајќи зад себе голема деловна империја.
Сè уште не е јасно како богатството на Берлускони, изградено со поседување на некои од најпрепознатливите италијански компании, вклучувајќи го и успешниот фудбалски клуб Милан, ќе се подели на неговите пет деца.
Индексот на милијардери на „Блумберг“ ја процени нето вредноста на Берлускони на 7,6 милијарди долари.
Берлускони има пет деца од два брака. Сите имаат значителен удел во неговиот новоформиран семеен холдинг, компанијата „Фининвест“, но неговото најстаро дете, Марина (56), претседава со компанијата од 2005 година и се вели дека е најверојатно да ја преземе контролата врз деловната империја на нејзиниот татко.
Пјер Силвио (53) е извршен директор на MediaForEurope. Акциите на компанијата скокнаа за цели 10 отсто во понеделникот, пред да паднат на 2 отсто доцна попладнето, бидејќи инвеститорите очекуваа потенцијални промени во сопственоста по смртта на Берлускони.
Марина и Пјер Силвио имаат по 7,7 отсто од акциите во „Фининвест“, додека трите деца на Берлускони од вториот брак заедно поседуваат 21,4 отсто од акциите, пренесе „Ројтерс“.