Доналд Трамп изјави дека „Волмарт“ треба да престане да ги обвинува царините за зголемување на цените на своите производи откако малопродажниот синџир објави зголемување на цените.
Извршниот директор на „Волмарт“ рече дека зголемувањето на цените е резултат на превисоките царини на Трамп, особено за кинеските стоки.
„Ќе направиме сѐ што можеме цените да ги одржиме што е можно пониски. Но, со нивото на царините, дури и со нивоата што беа намалени оваа недела, не можеме да го издржиме целиот притисок бидејќи трговските маржи се многу мали“, рече директорот Даглас Мекмилон за време на обраќањето пред инвеститорите.
„ПРОГОЛТАЈТЕ“
Трамп одговори со објава на Truth Social: „Волмарт заработи милијарди долари минатата година, многу повеќе од очекуваното. Меѓу „Волмарт“ и Кина, како што велат, нека ги „ПРОГОЛТААТ ТАРИФИТЕ“ и нека не им наплаќаат ништо на нашите ценети клиенти. Ќе ве следам, а и вашите клиенти ќе ве следат!“
Економисти за Си-Ен-Ен изјавија дека царините најтешко ќе ги погодат Американците со пониски и средни приходи, кои традиционално се главни клиенти на „Волмарт“. Потрошувачите често доаѓаат во овој синџир за основни потреби како што е храната.
„Секогаш сме се обидувале да ги одржуваме цените што е можно пониски и тоа нема да се промени. Ќе продолжиме да го правиме тоа што е можно подолго, со оглед на реалноста на ниските маржи на малопродажба“, изјавија од „Волмарт“ за Си-Ен-Ен.