Германскиот канцелар Фридрих Мерц денес изјави дека во долг телефонски разговор јасно му ставил до знаење на американскиот претседател Доналд Трамп дека Европа мора да биде дел од секој процес за завршување на војната на Русија во Украина.
Мерц, по самитот на Г20 во Јоханесбург, рече дека му кажал на Трамп, во телефонски разговор синоќа, дека војните не можат да ги завршат големите сили над главите на погодените земји и дека војната може да се заврши само со согласност на Украина и Европа, објави Ројтерс.
„Ако Украина ја изгуби оваа војна и на крајот се распадне, тоа ќе има влијание врз европската политика како целина, на целиот европски континент. И затоа сме толку посветени на ова прашање. Во моментов постои можност да се заврши оваа војна, но сè уште сме доста далеку од добар исход за сите“, рече Мерц.