Турската лира забележа нов историски пад во однос на еврото, надминувајќи ја границата од 50 лири за евро за прв пат, објавува весникот „BirGün“. Курсот вчера достигна 50,0519 турски лири за евро во 15:12 часот по локално време (13:12 часот по наше време).
Според турскиот новински сајт Memurlar.net, девалвацијата на лирата е поврзана со најновото намалување на клучната каматна стапка од страна на Федералните резерви на САД, по што американскиот долар ослабе, а еврото зајакна. Зајакнувањето на европската валута во однос на доларот се пренесе и на девизниот курс евро-лира.
Според референтната стапка на Турската централна банка од 15:30 часот по локално време (13:30 часот по наше време), едно евро вчера се тргуваше за 49,8569 турски лири. На слободниот пазар, според информациите од весникот „Хуриет“, денес до 10:00 часот по локално време (08:00 часот по наше време), курсот достигна 50,1658 лири за евро.
„BirGün“ потсетува дека на 12 јуни 2025 година, турската валута ја премина границата од 45 лири за евро, што го нагласува тековниот тренд на девалвација.