Европа размислува за создавање нов воен сојуз со Украина, но без учество на САД, објави „Политико“. Форматот „Коалиција на волните“ потенцијално би можел да стане основа за нов безбедносен сојуз во ерата кога САД повеќе не го поддржуваат НАТО и европската безбедност“, пишува изданието.
Европските лидери се во постојана преписка со украинскиот претседател Володимир Зеленски, што додава уште една интригантна идеја. Украина е сигурно најмилитаризираната земја во Европа.
Доколку се вклучи воената моќ на Украина, како и онаа на Франција, Германија, Полска и Велика Британија, потенцијалната вооружена сила на „Коалицијата на волните“ би била огромна и би вклучувала и нуклеарни и ненуклеарни држави, додава „Политико“.
„Заканата на Трамп за казнени тарифи против секој што ќе се обиде да го спречи да го преземе Гренланд беше последната капка. Разводот, веруваат тие, сега е неизбежен. Во приватни разговори, зачудените европски претставници го опишаа обидот на Трамп да ја анектира суверената данска територија како „лудило“, прашувајќи се дали тој заглавил во својот „воен режим“ по неговата авантура во Венецуела.
Тие тврдат дека тој заслужува најсилен одговор од Европа за она што многумина го сметаат за чист и неиспровоциран „напад“ врз сојузниците преку Атлантикот, продолжува весникот.
Неформалната, но активна група е позната како „Вашингтонската група“, по збирката европски лидери кои ја посетија Белата куќа со украинскиот претседател Володимир Зеленски минатиот август.
Лидери како што се британскиот премиер Кир Стармер, францускиот претседател Емануел Макрон и германскиот канцелар Фридрих Мерц, како и претседателката на Европската комисија Урсула фон дер Лајен, финскиот претседател Александар Стаб и италијанската премиерка Мелони, редовно си испраќаат пораки – често во истиот групен разговор.
Во текот на изминатата година, тие развија добро усовршена рутина на размена на пораки секогаш кога Трамп ќе направи нешто непредвидливо и потенцијално штетно. „Кога работите почнуваат брзо да се движат, координацијата е тешка, а овој групен разговор е навистина ефикасен“, рече лице запознаено со аранжманот. „Тоа многу зборува за личните односи и колку се важни.“