Поголемиот дел од граѓаните на Европската Унија се депресивни поради глобалната ситуација, состојбата на нивните земји, околностите во кои живеат и опасностите што ги претставуваат политиките на американскиот претседател Доналд Трамп, според анкета објавена денес од порталот politico.eu.
Во анкетата на јавното мислење низ цела ЕУ, спроведена од Politico, најголем песимизам изразија граѓаните на Централна и Западна Европа, при што мнозинството (76 проценти) велат дека демократијата во нивните земји назадува.
Анкетата, спроведена од фирмата за стратешки комуникации FGS и ексклузивно објавена од Politico, анкетираше повеќе од 11.000 луѓе во 23 земји-членки на ЕУ.
Близу две третини (63 проценти) од анкетираните граѓани на ЕУ се согласија со одговорот дека „најдобрите години се зад нас“, а дури 77 проценти рекоа дека животот во нивната земја ќе биде уште потежок за генерациите што доаѓаат.
„Анкетата открива широко распространета загриженост за состојбата на европската демократија и капацитетот на владите (ЕУ) да се справат со предизвиците, кои вклучуваат војна на источните граници на континентот, економска и геополитичка несигурност и растечко триење со Вашингтон“, објаснува Politico.
Фото: Јутјуб/Принтскрин/ПОЛИТИКО
Според порталот, дури и пред тој да ги изрази своите претензии да го преземе Гренланд, повеќето Европејци го перцепирале американскиот претседател Доналд Трамп како негативен фактор за светскиот мир, нивната земја и глобалната економија.
Во нова анкета, во речиси сите земји-членки на ЕУ, мнозинството граѓани оцениле дека нивната земја е на погрешен пат. Исклучоци се Полска, Литванија и Данска, што, според Politico, е изненадување со оглед на тоа што Полска и Литванија се најизложени на потенцијална руска закана, а Данска на притисокот од САД околу Гренланд.
Анкетата открива дека Европејците се скептични во врска со политичките системи, повеќето национални влади и нивниот капацитет ефикасно да дејствуваат. Романија (91%), Грција (88%) и Бугарија (86%) се најјасни во ставот дека „системот ги изневерил луѓето и дека се потребни фундаментални реформи“.
На другиот крај од табелата, нордиските земји се најпозитивни, но во просек 70% од сите анкетирани граѓани на ЕУ изјавиле дека сметаат дека „имаат право да очекуваат повеќе од своите влади“.
Во анкетата, 71% се согласиле дека нивните земји треба да бидат поагресивни во заштитата на националните интереси, дури и ако тоа предизвикало несогласувања со другите земји.
Анкетата, иако спроведена пред неговото навлегување на Гренланд, го оценила глобалното влијание на Доналд Трамп како негативно од страна на мнозинството испитаници, за глобалната економија (69%), за мирот и безбедноста (64%) и за нивната земја (64%).
На прашањето дали претседателот на САД заслужува Нобелова награда за мир, 77% од анкетираните граѓани на ЕУ одговориле негативно.