СДСМ во Теарце освои 170 гласови повеќе отколку на изборите на 11 декември, но гласањето овде беше повеќе симболично, рече портпаролот на СДСМ и носител на шестата изборна единица, Петре Шилегов вечерва во Теарце.
– Со гордост можам да кажам дека граѓаните на Теарце гласаа за промени, за живот во Македонија без оглед на притисоците. Тие излегоа храбро и достоинствено и кажаа дека е доста и дека бараат одговорна влада која ќе одговори на потребите на граѓаните. Ќе ја послушаме пораката на терачани, а тоа значи дека ќе има одговорна влада која ќе воведе промени и ќе има институции кои што ќе одговараат на потребите на граѓаните. Гласањето овде е повеќе симболично. Идната влада ќе ја предводи СДСМ – рече Шилегов.
Како одговор на новинарско прашање што мисли за тоа дека ВМРО-ДПМНЕ веќе прогласиле победа, Шилегов рече дека „Груевски многу пати до сега рекол па порекол“ и дека гласот на Груевски е минато.
Тој додаде дека во Македонија нема политичка криза, туку криминална криза на структурите на власт./Мета