По три дена поминати под отворено небо, родителите на децата со посебни потреби, вчера  ги спакуваа шаторите и си заминаа од паркот „Жена борец“. Ќе кампуваат и следниот месец доколку нивните барања не се исполнат, но во меѓувреме велат дека нивната цел делумно е постигната со тоа што успеаја да им го привлечат вниманието на јавноста и политичарите.

„Важно е дека се појавивме и не видоа, добро е што и медиумите не видоа и покажуваат за што се бориме, а надлежните ќе почнат да размислуваат за ова.“ – вели Ѓорѓи Танев.

„Се бориме на институционален начин, но сметам дека некои работи ќе треба да се решат на други начини. Секој од нас, треба да дојдат и да дадат поддршка.“ – вели Лиса Баута Шакири.

Во последните часови пред да се спакуваат, во паркот „Жена борец“ имаше зголемена раздвиженост. Голем број граѓани и дел од јавните личности го посетија кампот и со потпис на петицијата, застанаа зад родителите во битката за исполнување на нивните барања.

Државата мора да обезбеди стручен кадар и соодветна терапија за лицата со попреченост, да се поништи старосната граница од 26 години за здравствено осигурување на лицата со посебни потреби и да се обезбеди соодветна грижа за децата по смртта на нивните родители – ова се барањата кои бараат што поскоро да бидат исполнети.