Министерот за внатрешни работи Оливер Спасовски одговарајќи на новинарско прашање за барањето на лидерот на ВМРО-ДПМНЕ Христијан Мицкоски да даде оставка од функцијата министер, му порача дека тој како лидер на опозицијата треба да размисли за сопствениот кредибилитет и да молчи.
-Јас од него очекував многу други одговори, кои треба да ги даде како лидер на опозицијата, во однос на важни прашања за македонската држава, а тоа од него не слушнавме. Воедно не слушнавме и да одговори за хидроцентралите, како и на кој основ ги има стекнато, ама веројатно ќе се даде одговор и на тоа прашање. Ако смета дека тоа во политиката му е потребно да повикува на давање на оставки малку треба да размисли за неговиот кредибилитет. Тој беше генерален секретар на криминалецот потврден Груевски во време кога ја водеа Македонија во бездна. Најмалку што може е да молчи, рече Спасовски при денешната посета на СВР Велес.
Доколку Мицкоски, како што рече Спасовски, смета дека треба да има дебата и по други прашања тогаш, како што додаде, очекува да има аргументи.
-Вакви празни кликања пред граѓаните не носат ништо добро, ниту за него, ниту за неговата партија, ниту за демократијата, потенцира Спасовски.