АктуелноБалканРазмисли

Европската комисија апелира до албанската власт и опозиција да се вратат на дијалогот

од Vlatko K
63 прегледи
  По одлуката на албанските опозициски пратеници да се откажат од пратеничките мандати, портпаролката на Европската комисија, Маја Коцијанчич во изјава за албанската државна агенција АТА, оценува дека тоа е конпрапродуктивно и е против реформските напори на Албанија за членство во ЕУ.

– Право на граѓаните да се ангажираат во мирни демонстрации е суштински елемент и суштинска вредност на секоја зрела демократија и мора да се гарантира. Сепак, употребата на насилни дејства и предизвикување штета врз јавниот имот како што можеше да се види минатата сабота во центарот на Тирана не се прифатливи. Парламентот е основа на секоја европска демократија – тоа е место каде што треба да се дискутира за реформите и развој, а не да се бојкотира, изјави Коцијанчич.

Таа додава дека очекуваат Владата и опозицијата да се ангажираат во конструктивна дискусија со цел надминување на актуелната политичка ситуација во земјата.

Експресно реагираа од обединетата опозиција преку демократскиот пратеник Енкелејд Алибеј.

– Каде беше госпоѓата и другите господа во 2014 година кога земјата беше претворена во оаза на марихуаната? Се консултиравме со странците, но пред се се консултираме со Албанците, додаде Алибеј.

Инаку, освен 43-те пратеници од Демократската партија, едногласна одлука за откажување од пратеничките мандати синоќа донесоа и 19-те пратеници од пратеничката група на Социјалистичкото движење за интеграција (ЛСИ).