Луѓето низ цела Европа ќе мора да работат драстично помалку часови за да се избегне катастрофално затоплување на климата, освен ако не се дојде до радикално запирање на користењето на фосилните горива и декарбонизирање на економијата. Ова го покажува новото истражување, цитирано од „Гардијан”.
Истражувањето, спроведено од експертската група „Аутономи“, покажува дека работниците во Велика Британија ќе мора да се префрлат на 9-часовни работни недели, за да може земјата да има шанса да избегне затоплување над 2 степени Целзиусови под сегашните нивоа на исфрлање на штетни гасови во атмосферата. Слични намалувања се утврдени како потребни во Шведска и Германија.
Констатациите се базираат на податоци на ОЕЦД и ОН за емисиите на штетни гасови за секој индустриски сектор во трите земји. Студијата покажа дека во сегашните нивоа на штетни гасови, и трите земји ќе мора драстично да го намалат работното време, како и дека треба да се преземат итни мерки за декарбонизирање на економијата, за да се спречи колапс на климатските услови.