Во пресрет на крајот на изборната кампања, коалицијата Национална алијанса за интеграција објави откажување на сите активности планирани за претседателот Али Ахмети во петок, со цел тој да учествува на утрешниот протест во Тирана за поддршка на лидерите на поранешната ОВК. Опишувајќи го ова како „чин на национална солидарност и сеќавање на жртвата што ја донесе слободата“, портпаролот на ДУИ, Арбер Адеми рече дека партијата ја затвора долгата и напорна кампања, но „со достоинство, смиреност и конкретна понуда до граѓаните“, дистанцирајќи се од, како што рече, „црните кампањи и манипулациите на политичките противници“.
-Не се занимававме со клевети, црни кампањи или манипулации. Зборувавме со јазикот на фактите, визијата и одговорноста. Нашата кампања ја изградивме врз довербата – не врз стравот. За жал, нашите противници ја избраа спротивната насока – патот на клеветите, фабрикувањата и темните сценарија. Наместо идеи, понудија лаги; наместо проекти, измислија скандали, наместо натпревар за развој, поттикнаа поделби. Од самиот почеток, самиот премиер изјави дека суштината на овие избори е исчезнувањето на ДУИ од политичката сцена, а потоа зборуваше и за политичко пензионирање на Али Ахмети. Тоа не е само политички речник, тоа е носталгија за време кога Албанците требаше да бидат под команда, а не рамноправни учесници во одлучувањето. Но тоа време заврши. Албанците никогаш веќе нема да бидат вазали на туѓа волја, кажа Адеми од седиштето на партијата.
Според него, постојат обиди во Кичево и во Бутел изборната трка да се претвори во етнички судир.
-Но, добро го знаеме ова сценарио. Кога не можат да победат со идеи, измислуваат, фабрикуваат и шират дезинформации – со надеж дека граѓанинот ќе ја изгуби довербата. Но, албанскиот граѓанин повеќе не може да биде измамен. Тој знае кој застанал покрај него во тешките денови и кого се памети само во пресрет на изборите.
Денес, во оваа кампања, се раѓа нов завет – завет на надеж, достоинство и враќање на вербата во силата на народот. Граѓани од сите сфери на животот, дури и поранешни поддржувачи на ВЛЕН, ни се придружуваат и отворено велат: „Се надевавме на промени, но завршивме со разочарување и покорност“.
19 октомври не е само датум за избори – тоа е референдум! Референдум за враќање на достоинството, за целосна еднаквост, за напредок и правда. На 19 октомври, Албанците ќе се изјаснат – ќе ги изберат своите политички претставници, а не оние што ги назначува Мицкоски или неговата политичка оска. Ова е наш момент на единство, наш момент да го запечатиме со глас достоинството, еднаквоста и европскиот правец на земјата. 19 октомври е референдумот на Албанците за иднината, кажа Адеми на прес-конференција.