Именувањето на Аријанит Хоџа за шести потпретседател на Демократска унија за интеграција (ДУИ) отвори серија чувствителни прашања за внатрепартиските односи, рамнотежата на моќ и идната кохезија на партијата што веќе подолго време се соочува со внатрешни турбуленции.
Одлуката, донесена на предлог на лидерот Али Ахмети и потврдена од Генералниот совет, според партиски извори, не била едногласно прифатена, иако формално поминала без блокади.
Потег со повеќеслојна порака
Партиски извори од ДУИ брифираат за „Локално“ дека вклучувањето на Хоџа во највисокото раководство е дел од поширока стратегија на Ахмети за „консолидација и проширување“ на партиската структура, особено во пресрет на можни изборни циклуси и редефинирање на политичките позиции на албанскиот блок.
Според нив, претопувањето на Европската демократска партија во ДУИ требало да испрати порака за отвореност и апсорпција на помалите политички субјекти, но истовремено и да ја зацврсти централната контрола.
Сепак, токму начинот и брзината со која Хоџа се искачи до потпретседателска функција се посочуваат како главен извор на незадоволство кај дел од старите кадри.
Во партиските кулоари се зборува дека одлуката е доживеана како прескокнување на внатрешната хиерархија и занемарување на функционери кои со години биле дел од раководните тела.
Внатрешно незадоволство, но без отворен бунт
Иако реакциите во ДУИ се опишуваат како „бурни“, соговорниците нагласуваат дека засега станува збор за тивко, контролирано незадоволство, без јасно артикулиран отпор или организирана фракција.
„Има луѓе што се чувствуваат маргинализирани, но нема критична маса што би ризикувала отворен судир со Ахмети“, вели еден висок функционер.
Фото: Фејсбук/ДУИ
Според истиот извор, дел од раководството смета дека воведувањето на шести потпретседател дополнително ја разводнува одговорноста и ја комплицира внатрешната координација, особено во период кога партијата е во опозиција и се обидува да ја консолидира својата политичка позиција.
Ризик од нови поделби?
Прашањето дали Аријанит Хоџа може да стане катализатор за нови поделби во ДУИ, според аналитичката проценка на партиските извори, зависи од два фактори: неговата идна улога во партијата и начинот на кој Ахмети ќе управува со незадоволството.
Доколку Хоџа добие видлива и влијателна улога во креирањето на политиките, без да се изгради поширок консензус, тоа би можело дополнително да ги продлабочи постојните тензии.
Од друга страна, ако неговата функција остане повеќе симболична, ризикот од сериозни внатрешни потреси се смета за ограничен.
„ДУИ и порано поминувала низ вакви моменти. Клучот секогаш бил во способноста на лидерот да ги амортизира разликите“, оценува партиски извор, додавајќи дека засега Ахмети сè уште има доволно авторитет за да ја држи партијата под контрола.
Баланс меѓу интеграција и стабилност
Именувањето на Хоџа ја отвора дилемата дали стратегијата на интегрирање на нови политички актери ќе донесе свежина и поширока поддршка, или ќе ја оптовари партијата со дополнителни внатрешни несогласувања.
За ДУИ, која со години функционира како силно централизирана структура, предизвикот ќе биде да го задржи внатрешниот баланс меѓу лојалноста, искуството и потребата од обновување.
Во моментов, сигналите од внатрешноста на партијата укажуваат дека незадоволството е реално, но контролирано. Дали тоа ќе прерасне во подлабока криза или ќе остане уште една епизода во долгата историја на внатрешни превирања во ДУИ, ќе зависи од потезите што допрва ќе следуваат.
Б.Т.