Добротворната фондација на Бил и Мелинда Гејтс ќе донира 200 милиони долари во фонд за финансирање на иницијативата “Секоја жена, секое дете” на ООН. 
Информацијата за дарежливата донација беше објавена од страна на прес-службата на Светската организација. Во соопштението се цитираат зборовите на генералниот секретар на ОН Антониу Гутериш, кој наведува дека благосостојбата на жените, децата и адолесцентите “е клучен услов за спроведувањето на програмата за одржлив развој за периодот до 2030 година”.
Во меѓувреме, тој потсетува дека меѓународната заедница “има обврска да помогне да се достигне целосниот потенцијал на програмата”.
Мелинда Гејтс пак истакна дека “обезбедувањето на средства за заштита на здравјето на жените и децата е од огромно значење, бидејќи може да им помогне на најсиромашните да се избават од својата беда”.
Фондот во прашање се занимава со иницијативи насочени кон подобрување на животните услови и здравјето на жените и децата во 50 земји, особено во земјите во развој. Како што е наведено во изјавата на ОН, менаџерите на фондовите се надеваат дека ќе привлечат околу 2 милијарди долари во текот на следните 5 години.
“Секоја жена, секое дете” е иницијатива на осмиот генерален секретар на ОН, Бан Ки-Мун, како дел од Глобалната стратегија за здравјето на жените и децата. Таа доби одобрување во 2010 година на редовната годишна седница на Генералното собрание на ОН.