Италијанскиот тренер сега е поблиску до клупата на бразилската репрезентација отколку што беше случај пред неколку дена.
Претставници на Бразилската фудбалска конфедерација (CBF) преговараат со Карло Анчелоти, но тие разговори се комплицирани од фактот дека италијанскиот тренер има договор за уште една сезона со Реал Мадрид, потврдија за АП два анонимни извори од CBF.
Еден извор изјави дека претседателот на CBF, Едналдо Родригез, и директорот на репрезентацијата, Родриго Каетано, се вклучени во преговори со Анчелоти.
Бразил е без селектор од 28 март, откако Доривал Жуниор беше отпуштен три дена по поразот од Аргентина (1:4) во Буенос Аирес.
„И тие ги држат преговорите под контрола. Јасно е дека засега нема договор со никого“, изјави изворот за АП, додавајќи дека CBF „не брза“.
Тој призна дека Бразил се надева дека ќе претстави нов селектор за фудбалската репрезентација на земјата пред 20 мај, кога треба да биде објавен составот за двата квалификациски натпревари за Светското првенство во 2026 година, кои ќе се играат во јуни.
АП објави дека бразилските медиуми објавиле дека Португалецот Хорхе Жесус, кој моментално е тренер на Ал Хилал, е алтернатива доколку преговорите со Анчелоти не успеат.