Чешката влада ја нарече Русија директна закана, а Кина системски предизвик во новата безбедносна стратегија, која владата ја усвои во средата, што го одразува, како што се наведува, крајот на периодот на мир и стабилност во Европа по крајот на Студената војна.
Централноевропските земји и членки на НАТО и ЕУ „мора внимателно да се подготват за можноста да станат дел од вооружен конфликт“, иако ризикот од напад врз земјата останува низок, се наведува во стратешкиот документ.
Чешка почна да ги разгледува односите со Русија и Кина кога актуелната влада ја презеде функцијата кон крајот на 2021 година, откако претходната влада на поранешниот претседател Милош Земан одржуваше блиски контакти со двете земји.
По руската инвазија на Украина во февруари 2022 година, сегашната влада на десниот центар брзо го поддржа Киев со испраќање воена опрема, вклучително и тенкови.
„Русија намерно дејствува против чешката политичка, економска и социјална стабилност“, се вели во стратешкиот документ. „Тоа претставува фундаментална закана за нашата безбедност“, се додава.
Кина, се посочува, „го доведува во прашање меѓународниот поредок“, што има штетни последици за евроатлантската безбедност.
„Заедничкиот интерес на Русија и Кина е да го ослабат влијанието и единството на демократските земји. Ова системско ривалство е долгорочно“, посочи тој.
Во претходната чешка безбедносна стратегија од 2015 година, Русија и Кина не се споменуваат по име.
Врските со Русија станаа затегнати во 2021 година, пред војната во Украина, кога чешките безбедносни служби ја обвинија Русија дека стои зад експлозијата во складиште за оружје во 2014 година, кога беа протерани десетици руски дипломати. Русија ги отфрли обвинувањата.
Во стратегијата се наведува дека Русија ги слабее демократските институции и го дестабилизира општеството преку хибридна акција.
„Доколку во Русија не се случат фундаментални и длабоки политички и општествени промени, Русија ќе остане закана за европскиот простор, без оглед на исходот од војната во Украина“, се наведува во документот.
Односите со Кина се заладија кога не се остварија плановите за големи кинески инвестиции и кога чешките парламентарни лидери и актуелната влада ги продлабочија врските со Тајван, иако двете земји немаат официјални дипломатски односи.