Денешните натпревари од 23. коло во италијанската Серија А, минаа во знакот на Марко Пароло, кој постигна четири гола во победата на Лацио на гостувањето кај Пескара со 6-2.
Во листата на стрелци кај гостите се запишаа и Кеита Балде и Чиро Имобиле, додека головите за домаќините ги постигнаа Бенали и Бругман, а Цапрари не искористи пенал.
Македонскиот репрезентативец Горан Пандев беше стартер во тимот на Џенова за кој одигра 68. минута, во поразот на оваа екипа на домашен терен од Сасуоло со 0-1.
На останатите натпревари одиграни попладнево, беа постигнати овие резултати: Милан – Сампдорија 0-1, Емполи – Торино 1-1, Киево – Удинезе 0-0 и Аталанта – Каљари 2-0.
Од денешната програма остануваат да се одиграат уште две средби. Од 18 часот ќе се игра натпреварот, Палермо – Кротоне, додека во вечерниот термин од 20.45 часот ќе стартува дербито меѓу Јувентус и Интер.
Последниот меч од ова коло на програмата е во вторник, а во него Фиорентина ќе биде домаќин на Рома.
Табела: Јувентус 51 бодови, Наполи 48, Рома 47, Лацио 43, Интер 42, Аталанта 42, Фиорентина 37, Милан 37