Еден човек е убиен, а двајца ранети во напад со нож и чекан на улиците во центарот на Париз.
Нападот се случил во близина на Ајфеловата кула, нешто пред девет часот навечер по локално време во саботата.
Уапсен е 26-годишен државјанин на Франција, кој веќе им е познат на безбедносните служби. Истрагата ја води обвинителот за антитероризам.
Официјални лица потврдија дека жртвата е германски државјанин.
Францускиот министер за внатрешни работи Жералд Дарман изјави дека убиениот, роден 1999 година, бил со сопругата кога бил нападнат и избоден до смрт.
Тој додаде дека жената била спасена благодарение на интервенцијата на таксист, а осомничениот избегал преку мостот на реката Сена.
Осомничениот потоа нападнал уште две лица, удирајќи го едниот со чекан во окото, додаде министерот.
Полицијата потоа го совлада осомничениот напаѓач и го уапси под обвинение за убиство со умисла и обид за убиство во врска со терористичка активност.
Двајцата повредени, 60-годишен Французин и турист, се згрижени од медицинските служби и нивните животи не се во животна опасност.
Веднаш била покрената полициска акција во близина на метро станицата Бир-Хакеим, а властите апелирале луѓето да го избегнуваат тој дел од градот.
Дарман рече дека осомничениот напаѓач викал „Алах Акбар“, што значи „Господ е голем“ на арапски и на полицијата и рекол дека е вознемирен бидејќи „толку многу муслимани умираат во Авганистан и Палестина“.
Тој додаде дека осомничениот поминал четири години во затвор за планирање на нападот во 2016 година и бил на списокот за следење на француските безбедносни служби.
Исто така, е познато дека страдал од психијатриски нарушувања, рече Дарман.
На социјалните мрежи се појави видео во кое осомничениот ја критикува француската влада и зборува за, како што вели, убиство на невини муслимани, пренесува АФП.
Францускиот претседател Емануел Макрон на социјалната мрежа Х, порано Твитер напиша дека неговите мисли се со сите погодени од „терористичкиот напад“ и им се заблагодари на службите за нивната реакција.
„Јавниот обвинител за антитероризам сега ќе биде одговорен да открие што се случило за да може правдата да биде задоволена во име на народот на Франција“, напиша Макрон.
Нападот се случи два месеци откако наставник беше избоден до смрт во средно училиште во северниот град Арас, поради што француската влада прогласи највисоко ниво на безбедносна тревога.