Европскиот парламент (ЕП) денеска побара од властите во Белорусија да престанат со малтретирањето на опозиционер кој е затворен поради спротивставување на претседателот Александар Лукашенко и веднаш да го ослободат него и другите политички затвореници.
Виктор Бабарико беше осуден на 14 години затвор во 2021 година под обвиненијата што ги отфрли како политичка казна за обидот да ја оспори победата на Лукашенко на претседателските избори во 2020 година.
Бабарико е поранешен банкар и важеше за најсериозен кандидат против Лукашенко на претседателските избори одржани на 9 август 2020 година. Бабарико беше уапсен пред изборите и никогаш не му беше дозволено да влезе во трката.
ЕП објави дека Бабарико бил хоспитализиран во април со траги од повреди од малтретирање за кои била потребна хируршка интервенција.
Поддржувачите на опозициската личност изјавија дека белоруските власти не дале никакви информации за неговата состојба и му забраниле на неговиот адвокат да го посети.
ЕП го осуди „нехуманиот третман на политичките затвореници и членовите на нивните семејства“.
Белорусија беше потресена од големи антивладини протести на претседателските избори, чии резултати опозицијата и Западот ги сметаат за наместени. По изборите имаше протести кои беа задушени од локалните власти.