Идејата за „фајнал-фор“ во Лигата на шампионите најверојатно ќе стане реалност. „Тајмс“ пишува дека планот добива на популарност меѓу официјалните лица на УЕФА и водечките клубови, а слична одлука е можна на 11 мај, за кога е закажан Конгресот на европската централа во Виена. Сепак, иновацијата нема да стапи на сила до сезоната 2024/25.
Тоа значи промена на досегашниот формат, според кој полуфиналето се игра по познатата шема со два меча – дома и гостување – по што следи финале. „Фајнал-форот“ ќе значи дека четворицата полуфиналисти ќе се соберат во еден град, каде што во рок од една недела прво ќе спорат во меч за пласман во финалето, а потоа двајца од нив ќе играат за самиот трофеј. Ова е пракса, на пример, во кошаркарската Евролига.
По исклучок, нешто слично веќе имаше во Лигата на шампионите на крајот од сезоната 2019/20. Потоа поради пандемијата беа наметнати одредени промени, а сите натпревари од четвртфиналето до крајот се играа во Лисабон.
Инаку, од сезоната 2024/25 во прашање, тимовите во Лигата на шампионите ќе се зголемат од 32 на 36. Сегашниот формат на групи од четири екипи речиси сигурно ќе испадне, а се разговара и тимовите да се поделат на две големи групи од по 18, слично како во конференциите во НБА.