Со влегувањето на Трамп во Белата куќа, започна нова ера, се согласуваат коментаторите во германските весници. Но, мислењата се различни за тоа колку Трамп ќе успее да ги изолира САД и како Германија и Европа треба да одговорат, пишува „Дојче веле“.
„Никој што гласал за него не може да каже дека не знаел што доаѓа“
„Човек не смее да се навикне на ова лудило“, пишува германскиот весник „Зидојче цајтунг“ во коментар на инаугурацијата на Доналд Трамп. Во текстот се вели дека новиот американски претседател веднаш се обидел да го продаде својот презир кон сите како нормалност.
„Едно мора да му се признае – никој што гласал за него не може да каже дека не знаел што доаѓа“, пишува минхенскиот весник.
Друг голем дневен весник, „Франкфуртер алгемајне цајтунг“, пишува дека САД остануваат еден од најблиските сојузници на Германија и дека земјата е насочена кон американскиот штит поради „заканата од Русија“.
„Во таа ситуација, треба да го пречекаме новиот претседател барем неутрално. Ќе има доволно време за разлики. За време на првиот мандат на Трамп, Германија се дефинираше како еден вид спротивен пол и вистински лидер на Западот, а речиси сите (германски) партии го сторија тоа“.
„Дури и тогаш тоа беше надвор од можностите на државата, но денес тоа би било вистинско непочитување на состојбата во светот. Меѓу многуте домашни задачи на следната сојузна влада е новото прилагодување на надворешната политика“, пишува весникот од Франкфурт во пресрет на германските избори на 23 февруари.
Коментатор на весникот „Badische Neueste Nachrichten“ од Карлсруе размислува поинаку. Тој пишува дека не е во ред да се бара разбирање и излегување во пресрет на Трамп, бидејќи тој ја гледа надворешната политика како игра на се или ништо и не е подготвен за компромис. „Таков беше и неговиот инаугуративен говор“, забележува коментаторот и продолжува:
„Пооптимистички тон, но во суштина мрачен како пред осум години, Трамп во своето прво обраќање до нацијата вети дека ќе го запре озлогласениот пад на Америка. Како? Со понатамошна милитаризација на надворешната граница, користење фосилни горива и наметнување трговски тарифи против пријателите и непријатели“.
„Овие луѓе го обликуваат светот како им одговара“
Весникот „Рајнфалц“ од Лудвигсхафен ја разгледува листата на гости на големиот ден на Доналд Трамп и забележува дека таму биле италијанската премиерка Џорџија Мелони и британскиот десничар Најџел Фараж, а не, да речеме, Урсула фон дер Лајен, Олаф Шолц или Емануел Макрон.
„Трамп го дели целиот Запад. И Европа не го искористи периодот без Трамп за да ги обедини силите за одбрана на европските интереси против агресивната Америка, Прво. Уште полошо, Стариот континент, поделен и слаб како никогаш досега, се соочува со американски претседател кој пука од моќ и спремен е на се“, оценува овој весник.
„Донаукиер“ од Инголштад пишува за „новата ера“. Тоа е ера „во која не се бројат фактите и етиката, туку моќта и волјата“. „Како кинескиот диктатор Кси и рускиот владетел Путин, Трамп собира олигархиска номенклатура околу себе. Јавното мислење и конвенционалните правила веќе не се важни – овие луѓе го обликуваат светот како што сакаат“.
„Lausitzer Rundschau“ од Котбус пишува: „За време на Трамп, хегемонот од последните осум децении ќе се повлече уште повеќе и ќе се сврти навнатре. Овие можеби се добри години за Америка, но ќе бидат ризични за светот“.
Берлинскиот „Тагесшпигел“ ги наведува проблемите: „Миграцијата, Блискиот Исток, Украина, Кина – тука се потребни акции, а не само зборови. Иако изолационистичкото крило на републиканците би сакало нешто друго, слоганот „Америка на прво место“ изгледа наивен со оглед на глобалните кризи и можните последици“.
„Моќта на Трамп е застрашувачка“
„Франкфуртер Рундшау“ забележува дека моќта на Трамп сега е „застрашувачка“, но дека тој нема конзистентна стратегија за тоа како да ги депортира мигрантите, притоа да го почитува Уставот како што најави и да не и наштети на економијата, како да го „врати“ Панамскиот канал, како да ги зголеми тарифите без да предизвика инфлација.
Веќе, пишува овој весник, „берзите паднаа, иако скокнаа по изборната победа на Трамп. Финансиските пазари, како што е познато, не го ценат денес, туку утре. И за разлика од првиот мандат, сега сите се подготвени за Трамп“.