Северна Кореја ослободува итни воени резерви на ориз, бидејќи недостатокот на храна се влошува бидејќи топлотните бранови и сушите дополнително го комплицираат снабдувањето во земјата.
Економијата на земјата долго време беше под закана поради пандемијата на ковид-19, и иако не се пријавени епидемии на глад и социјални немири, аналитичарите очекуваат понатамошно влошување на состојбата со храната во Северна Кореја до есенската жетва, пренесува АП.
Јужнокорејската Национална разузнавачка агенција (НИС) на состанокот на парламентарните комисии зад затворени врати објави дека Пјонгјанг дистрибуира ориз резервиран за воена употреба на населението што остана без храна, работниците и руралните заедници, потврдија јужнокорејските парламентарци.
Како што наведува агенцијата, според пратениците, НИС изјавила дека топлотниот бран и сушата уништиле ориз, пченка и други култури и предизвикале смрт на добиток во Северна Кореја, а оваа земја во просек има потреба од околу 5,5 милиони тони храна за 26 милиони луѓе, но во моментов недостасува околу милион тони.
Цената на оризот, најважната култура во Северна Кореја, двојно се зголеми од почетокот на оваа година, а по кратката стабилизација, во јули имаше нов раст, додека властите се обидуваат да ја контролираат цената на житарките на кои населението е најчувствително.
Северна Кореја имаше сличен недостаток на храна во годините пред пандемијата, но тогаш нејзините потреби беа задоволени со шверц на ориз и други зрна преку пропустливата граница на земјата со Кина.
Постојаното затворање на границите на север поради пандемијата го направи таквиот шверц исклучително тежок во последно време, што го влоши овогодинешниот недостаток на храна.
Најновата проценка на јужнокорејското разузнавање доаѓа откако севернокорејскиот лидер Ким Јонг Ун призна дека неговата земја се соочува со „најлошата криза“ поради пандемија и други тешкотии, па дури и можен недостаток на храна.