Претседателката Гордана Сиљановска-Давкова денеска оствари средба со Џери Дибл, претставничка на УСАИД во земјата, на која присуствуваше и американската амбасадорка Анџела Агелер. На средбата беше изразена благодарност кон Дибл за нејзиниот долгогодишен ангажман и придонес во развојот на партнерството меѓу Северна Македонија и САД. Претседателката нагласи дека проектите поддржани од УСАИД оставиле значаен белег во земјата, особено во повеќе важни сектори, и дека Македонија очекува да се завршат сите започнати активности.
Сиљановска-Давкова истакна и подготвеност за натамошно јакнење на соработката со Соединетите Американски Држави, кои се стратешки партнер на земјата. Особено беше нагласена можноста за продлабочување на економската и политичката соработка, како и важноста на поддршката од САД во процесот на евроинтеграција.
Џери Дибл потенцираше дека во изминатите три децении УСАИД инвестирал над 900 милиони долари во различни развојни проекти во Македонија. И покрај намалувањето на средствата за помош, таа изрази надеж дека, во соработка со амбасадата и другите партнери, ќе успеат да ги завршат започнатите проекти и да ги зачуваат постигнатите резултати.
Американската амбасадорка Анџела Агелер изрази жалење поради затворањето на канцеларијата на УСАИД во земјата, но увери дека амбасадата, заедно со владините и други партнери, ќе продолжи да го поддржува финализирањето на важните програми за развој. Оваа средба го потврдува значењето на долгорочната соработка меѓу Македонија и САД, како и заложбите за натамошен развој и стабилност во регионот.