Грција ги зголемува воените сили на границата со Албанија, за да се бори против шверцот. Грчкиот министер за одбрана Панос Каменос, кој е лидер и на партијата Независни Грци, соопшти за зголемување на копнени сили, хеликоптери и сили за безбедност на морската граница со Албанија. Се зголемува бројот на предните војничкиот позиции до границата .
Министерот Каменос рече дека луѓето кои живеат во пограничните региони побарале заштита, бидејќи се плашат за својот живот од движењето на шверцери на оружје и дрога, како и на илегални имигранти. Според локалните жители полицијата не е доволна.
Каменос изјави дека заедно со Генералштабот на Армијата е подготвен план за трансфер на копнени сили, кои ќе спроведуваат воени вежби во регионот. Нивното присуство ќе гарантира безбедност на жителите, а според министерот се дава можност и на невработените да се вратат во своите родни места и да се занимаваат со земјоделство.
Ненадејната воена активност на грчко-албанската граница се поврзува со испратениот од страна на Тирана демарш до Атина против енергетски студии во Јонското Море, како и претензии за копнената граница меѓу двете држави.
Министер Панос Каменос категорично изјави дека за националниот суверенитет на Грција не се дискутира и додаде дека границата на земјата нема да се промени ниту метар по копно, воздух и море.