Претстојниот референдум претставува одлучувачки патоказ за натамошниот пат на земјата кон ЕУ, но сепак Македонците се тие кои треба сами да одлучат во која насока ќе се движат, вели шефот на германската дипломатија Хајко Мас во интервју за МИА непосредно пред неговата денешна посета на Македонија.
Мас функцијата министер за надворешни работи во кабинетот на Ангела Меркел ја врши од 14 март 2018 година, а претходно беше министер за правда и заштита на потрошувачите. Тој доаѓа од редовите на Социјал-демократската партија, а во интервјуто за МИА говори за Договорот со Грција, за претстојниот референдум и неговата важност за иднината на земјата, како и за неопходноста од постоење критичка дебата во секоја земја, која се декларира како демократска.
Министре Македонија ја посетувате во период на интензивна дипломатска активност, пред претстојниот референдум, закажан за 30 септември. Канцеларката Меркел беше тука на Денот на независноста, 8 септември. Кусо по неа пристигнувате и Вие. Која ќе биде главната порака што ќе ја пренесете за време на средбите во Македонија?
– Не можам да си замислам подобар момент за посета. Владите на Скопје и Атина во јуни испишаа историја. Спорот за името стоеше 25 години меѓу Македонците и Грците. Сега постои историска шанса за надминување на овој спор, а со тоа би се надминала и една од одлучувачките пречки за приближувањето на Скопје кон Европската унија. Сакам да ги охрабрам Македонците да продолжат по овој пат. Истовремено јасно ќе пренесам: ние стоиме зад европската перспектива на Западниот Балкан. Тоа ќе остане така.
Секако ќе се сретнете со вашиот домаќин, шефот на дипломатијата Никола Димитров и со другите претставници на власта. Дали ќе има средба со претставници на опозицијата и доколку имате која ќе биде Вашата порака до нив?
– Секако дека сме во контакт со сите демократски сили во земјата. Затоа и ќе учествувам на дебата во Скопје, каде различни гласови од македонското општество ќе имаат можност да бидат слушнати. Тоа ми е важно. Една демократија живее од критичната дебата. Истовремено е јасно: политичарот, без разлика дали од опозицијата или од владата, треба секогаш да ја стави својата работа во служба на граѓанките и граѓаните на земјата. Тоа важи за Германија, а тоа важи и овде.
Што ако референдумот не успее?
– За нас овој референдум претставува одлучувачки патоказ за понатамошниот пат на Скопје во правец на ЕУ. Сепак, на крајот, Македонците треба сами да одлучат во која насока ќе се движат. Оваа одлука никој не може да им ја одземе, и добро е што е така. Важно е што е можно поголем број на граѓани да го искористат своето демократско право и да гласаат.
Доколку Договорот помине во Македонија, дали очекувате опструкции во Грција?
– Договорот не би бил добар само за Македонците. И Грција ќе профитира од стабилноста и развојот во регионот. Во Договорот гледаме историска шанса, тоа важи за двете земји. Овој став ќе го истакнам и за време на мојата посета на Грција.
Ана Цветковска