Инстаграм минатиот октомври најави планови за ограничување на содржината на профилите на тинејџери врз основа на филмски рејтинзи за возраст над 13 години во земји како Австралија, Канада, Велика Британија и САД. Гигантот меѓу социјалните мрежи соопшти дека овие насоки сега се применуваат на глобално ниво за сите тинејџерски профили. Овој чекор следуваше откако судови во Њу Мексико и Лос Анџелес минатиот месец ја прогласија компанијата „Meta“ за одговорна за нанесување штета на тинејџерите.
Идејата зад оваа мерка е Инстаграм да прикажува помалку содржини со теми како екстремно насилство, сексуална голотија и експлицитна употреба на дрога. Компанијата исто така ќе сокрива или ќе престане да препорачува објави со непримерен речник, одредени ризични акробации, како и објави што прикажуваат прибор за употреба на марихуана.
Компанијата воведе и нова опција наречена „Ограничена содржина“ (Limited Content), која носи построги филтри и им оневозможува на тинејџерите да гледаат, оставаат или примаат коментари под објавите.
„Исто како што може да се види сугестивна содржина или да се слушне груб јазик во филм означен за возраст 13+, тинејџерите повремено можат да видат нешто слично и на Инстаграм, но ние ќе продолжиме да правиме сè што можеме таквите случаи да бидат што поретки. Свесни сме дека ниеден систем не е совршен и посветени сме на негово подобрување со текот на времето“, наведе компанијата во блог-објава.
Минатата година, кога „Meta“ ги воведе овие ограничувања, ги промовираше како лимити инспирирани од PG-13 рејтингот. Меѓутоа, Американското здружение на филмски продуценти (MPA) испрати опомена пред тужба, барајќи „Meta“ да престане да го користи тој термин, со образложение дека системот на филмски рејтинзи не може да се споредува со содржината на социјалните мрежи.
Се чини дека „Meta“ оттогаш се оддалечила од тоа брендирање. Во најновата објава, компанијата призна дека „постојат разлики меѓу филмовите и социјалните мрежи“ и наведе дека рејтинзите ги одразуваат поставките кои се најблиски до „Инстаграм-еквивалент“ на филм соодветен за тинејџери.
„Meta“ постојано е под лупа на јавноста поради тоа што дава приоритет на растот на производите, додека го занемарува менталното здравје на тинејџерите. Компанијата зазеде одбранбен став, воведувајќи нови контроли и ограничувања со цел потенцијално да ја намали штетата врз младите корисници. Во последните неколку месеци, „Meta“ воведе систем преку кој родителите се известуваат ако тинејџерите пребаруваат содржини поврзани со самоповредување, нови родителски контроли за искуства со вештачка интелигенција, а исто така привремено им го оневозможи пристапот на тинејџерите до ВИ-карактери додека работи на нова верзија.
Во меѓувреме, судски документи открија дека „Meta“ со години чекала да воведе функции како автоматско заматување на експлицитни слики во приватни пораки, иако била свесна за проблемот. Најновиот чекор на компанијата за проширување на ограничувањата на содржината ширум светот би можел да биде превентивна мерка, бидејќи оваа мрежа може да се соочи со дополнителни проверки на своите практики за заштита на децата во различни региони по судските постапки во Њу Мексико и Лос Анџелес.