Министерката за образование и наука Весна Јаневска изјави дека дистрибуцијата на наставниците во Македонија е нерамномерна и дека ќе се врши прераспределба на наставниците во контекст на воведувањето на едносменска настава. Според неа, некои училишта имаат прекумерен број на наставници, додека во други недостасуваат. Целта е да се задржат работните места на наставниците, кои ќе станат пофункционални. Прераспределбата ќе се спроведува со соработка на Министерството, локалната самоуправа и менаџерите на училиштата.
,,Дистрибуцијата на наставници во училиштата во Македонија е нерамномерна. Во некои училишта постојат повеќе паралелки со 12, 10 или 15 деца, и треба да се зачуваат работните места на наставници, кои што во овој момент би биле вишок ако се спојат паралелките. Но, пак, во други училишта, има недостаток на наставници, ако ја спроведеме целосно едносменската настава. Поради тоа, ќе правиме прераспределба на наставници, од таму каде што ги има вишок, во тие општини каде што тие недостасуваат. Јас и натаму тврдам дека наставниците нема да останат без работа, тие само ќе станат пофункционални. Прераспределбата ќе ја прави Министерството, заедно со локалната самоуправа и со менаџерите на училиштата – рече Јаневска.
Таа исто така изјави дека продолжува соработката со Здружениот истражувачки центар на Европската комисија во Италија, со акцент на важни области како што се науката, технолошкиот развој, земјоделството, кибер безбедноста и заштитата на воздухот.