Во моментов работата не оди добро, дури и поранешниот премиер Борисов фаќа кривини. За време на овие 4 години, во кои ВМРО беше дел од владата, имаше неверојатно силен притисок од неколку надворешно-политички фактори – Германија, САД, евробирократите, за нашата земја да отстапи во спорот со С. Македонија“, изјавил лидерот на ВМРО-БНД, Красимир Каракачанов утринава во разговор за телевизијата бТВ.
Според него, „поразително е да се согласат дека постои посебна македонска нација, дека има македонско малцинство во Бугарија, односно да ја напуштат историјата и да се помират со фактот дека со децении во Скопје политичарите го едуцираат населението во антибугарски дух“.
Тој му префрла на Борисов и што зборувал за „два народа“ и „две нации“.
„Не се согласивме и не потклекнавме. Претходната влада не попушти и само благодарение на ВМРО-БНД. Сега, сепак, притисокот очигледно продолжува. Сакате да имате здрав рбет, секој мора да одговори на прашањето зошто станува политичар: да им служи на интересите на својот народ или да му угоди на амбасадорот. Јас го направив мојот избор одамна. Може да бидам критикуван за многу работи, но никогаш не отстапив од интересите на Бугарија“, потенцирал Каракачанов во разговорот.
Поранешниот премиер Бојко Борисов во воведот на состанокот со премиерот Зоран Заев ѝ порача на македонската делегација дека ќе бидат залудни останататите средби во Софија, со претседателот Радев и со техничката влада.
„Јас сум убеден, бидејќи ги познавам луѓето со кои ќе се сретнете денеска, особено за Радев, дека ќе ви кажат дека без парламент не можат ништо да направат. Тој повторно ќе ја префрли одговорноста на парламентот како претходно. Сегашната техничка влада ги има сите права и може да преговара со вас. Нов договор, ако нашиот не им се допаѓа. Но, ќе избегаат од одговорност, како што секогаш прават. Истовремено ги лажат евроатлантските партнери дека се за членство на Северна Македонија во ЕУ“, рече Борисов.
Фото: bTV