Украинскиот министер за одбрана Олексеј Резников изјави дека Киев се надева дека ќе вооружи милион луѓе додека земјата се подготвува за нова фаза од војната, пренесува „Гардијан“.
„Влегуваме во нова, долга фаза на војната. За да победиме, мора внимателно да ги планираме ресурсите, да избегнуваме грешки и да ја проектираме нашата сила на таков начин што непријателот на крајот ќе се распадне“, напиша тој во објава на Фејсбук.
Тој му се заблагодари на британскиот секретар за одбрана Бен Валас за неговата поддршка во зголемувањето на помошта за Киев, како и на раководството на американските партнери, вклучувајќи го и неговиот американски колега Лојд Остин.
Целта на Украина е „да го врати нашиот суверенитет и територијален интегритет во меѓународно признатите граници“, рече тој. Резников додаде дека „се фокусира на потребата да се обезбедат милион луѓе кои ќе се соочат со непријателот“.
Тој исто така предупреди дека претстојат „исклучително тешки недели“ и дека на Украина и треба „единство, сплотеност, волја и трпение“ во овој исклучително тежок период.
Резников посочи дека на почетокот на војната „волонтерите биле исклучително корисни“ и, благодарение на нивната мобилност, „брзо ги решавале многу итните прашања“, објави Би-Би-Си.
Тој вели дека за да победи Украина мора да инвестира и во украинските производствени капацитети за да „обезбеди стабилност и зачестеност на испораките“. Во својата изјава тој наведува дека Украина се потпирала на помошта на граѓаните, волонтерите и граѓанските организации за значителен дел од својата воена опрема.