Кина ги повикува ОН да свикаат голем самит за Блискиот Исток

Специјалниот претставник на кинеската влада за Блискиот исток, Жаи Јун ги повика Обединетите нации да свикаат мировна конференција за решавање на палестинско-израелскиот конфликт.

Во изјавата објавена на официјалната веб-страница на кинеското Министерство за надворешни работи, Жаи посочува дека нациите на ОН мора да овозможат предвремено свикување на „поавторитативна, повлијателна и поголема меѓународна мировна конференција“, пренесе Интерфакс.

Кинескиот дипломат истакна дека ескалацијата на конфликтот е доказ дека игнорирањето на палестинското прашање е неприфатливо. Тој оцени дека излезот од магичниот круг на палестинско-израелскиот конфликт може да биде враќање на планот „Две држави за два народа“ и создавање независна палестинска држава.