Пациентите кои прележале корона сепак имаат сериозни последици во форма на хроничен замор, отежнато дишење, болки во мускулите, некои би спиеле цел ден, а за некои е голем напор да се искачат само на еден кат од скалите, пишува онлајн магазинот „Јуроп тудеј“.
Лекарите од клиниката „Џемели“ во Рим, Анџело Карфи и Роберто Бернабеи, спровеле истражување на над 150 пациенти кои прележале инфекција со коронавирус, пренесува Танјуг.
Од анкетираните, 87 проценти потврдија дека имаат барем еден од пост-ковидните симптоми, најмногу прекумерен замор, проблеми со дишењето, некои имаат психолошки проблеми и голем број на пациенти покажаа знаци на посттрауматско стресно нарушување по закрепнувањето.
Сите испитаници пријавиле проблеми со апетитот и намалена мускулна маса.
„Ковид19 е нова болест и ги знаеме симптомите засега, но малку се знае за последиците, и токму затоа ова истражување, прво од ваков вид, е многу важно“, вели Анџело Карфи.
Авторите на истражувањето истакнуваат дека има една добра работа: не се потврдени стравувањата на лекарите дека болеста ќе остави трајни последици врз белите дробови, црниот дроб, очите и срцето.
За пациенти кои биле лекувани во одделите за интензивна нега и биле подложени на оксигенација, лекарите препорачуваат редовно да проверуваат неколку внатрешни органи, проследено со долг период на физичко и психичко закрепнување.