Во нашата држава има пораст на пријавени случаи на семејно насилство при што во 90% од случаите жените се жртви на ова насилство, изјавил министерот за правда Кренар Лога кој присуствувал на Регионалната конференција „Обединети против насилство -Доста е“ која се одржала во Приштина.
„Насилството спрема жените и девојчињата е меѓу најзастапените повреди на човековите права. Тоа не смее да биде приватна работа и мора да има соодветен кривично правен одговор. Поради тоа неопходно е нашите активности да вклучуваат: Криминализирање на делата на насилство према жените и девојчињата“, рекол Лога.
На глобално ниво податоците покажуваат дека повеќе од пет жени или девојки се жртви на убиства секој час од некој во нивното семејство, Речиси секоја трета жена била изложена на физичко и/или сексуално насилство барем еднаш во животот. 86% од жените и девојките живеат во земји без правна заштита од родово базирано насилство.
Република Северна Македонија беше меѓу првите земји која што во 2011 ја потпишаа Истанбулската Конвенција, која влезе во сила во Јули 2018 година.
Во фебруари 2023 година е донесен Законот за изменување и дополнување на Кривичниот Законик со кој се изврши хармонизирање со Истанбулската конвенција. За прв пат се криминализира родово базираното насилство врз жените кое означува насилство насочено против жената поради нејзина припадност на женскиот род.
Се воведуваат нови кривични дела: Фемицид односно убиство на жена ило девојче до 18 години, Осакатување на женски полови органи, Демнење и Полово вознемирување.
-Истражувањето на ОБСЕ за насилството врз жените во Северна Македонија од 2019 година покажа, меѓу другото, дека 45% од жените доживеале психичко, физичко и/или сексуално насилство извршено од сегашен или поранешен интимен партнер. Значителен дел од жените во Северна Македонија (37%) посочиja дека нивните пријатели би се согласиле дека жената треба да го слуша својот сопруг. Речиси половина сметаат дека семејното насилство е приватна работа и треба да се постапува во рамките на семејството, а 32% сметаат дека е важно мажот да и покаже на својата партнерка кој е шеф. Овие традиционални верувања претставуваат значителен предизвик за борба против насилството врз жените во Северна Македонија, истакнал Лога во своето обраќање.