Владиката Наум во интервју за БТВ изјави дека Македонската православна црква -Охридска архиепископија испратила писмо до Светиот синод на Бугарската православна црква со барање да се дискутира прашањето за признавање на македонската црква и БПЦ да стане црква мајка. Бугарската државна телевизија БНТ во целсст го објави писмото испратено на 9 ноември. Ова е ретка историска шанса што БПЦ не треба да ја пропушти, рече митрополитот Наум.
Тој вели дека се исклучиво политички причините зошто автокефалноста на Македонската православна црква сѐ уште не е призната.
Во писмото од 9 ноември, меѓу другото се вели:
„Бугарската православна црква – бугарска патријаршија, имајќи ги предвид единството на православната Црква и реалните духовни и пастирски потреби, да воспостави евхаристиско единство со возобновената Охридска архиепископија во лицето на Македонската православна црква.
Македонската православна црква – Охридска архиепископија ќе ја препознае и признае Бугарската православна црква – Бугарска патријаршија како мајка црква, која прва ја прифаќа и признава нејзината автокефалност, истата ја обзнанува и актуелизира, претставува и се застапува за неа пред Вселенската патријаршија и пред другите помесни цркви.
Со потпишувањето на оваа согласност од поглаварите на двете цркви, да се воспостави евхаристиско единство и меѓу сите нивни епископи што ќе биде основа за непречено воспоставување на евхаристиско единство и со епископите од останатите помесни православни цркви.
За признавањето и воспоставувањето на евхаристиското единство, бугарскиот патријарх го известува Вселенскиот патријарх, како и поглаварите на другите помесни православни цркви.
Изразуваме надеж во Господа, дека овие наши предлози и барања ќе бидат прифатени од Светиот архиерејски синод на Бугарската православна црква, за радост на Свети Климент Охридски и за доброто на севкупната црковна полнота“.
Во емисијата се кажа дека поддршка на оваа идеја дал и дедо Пратениј, игумен на манастирот Свети Јован Бигорски. Освен тоа, беше кажано дека ако БПЦ се согласи на ова, треба да знае дека ќе се соочи со отпор од српската и руската црква, а тоа значи и од Вселенската патријаршија.
Архимандритот Партениј неодамна го поздрави потпишувањето на Договорот за добрососедство со Бугарија и изјави дека признавањето на автокефалноста на МПЦ-ОА треба да дојде од бугарската патријаршија. Отец Партениј смета дека канонската јурисдикција на територијата на која сега функционира МПЦ-ОА, последна ја имала Бугарската православна црква. Партениј ги охрабрува бугарските архиереи, во име на добрите односи меѓу двата народи, македонскиот и бугарскиот, БПЦ да ја признае автокефалноста на МПЦ-ОА.
„Бугарската црква, како единствена вистинска и достојна мајка-црква, со широко срце треба да ја признае македонската црква, која, еве, веќе половина век успешно ја врши својата пастирска и евангелиска мисија во една мултинационална држава, и е прифатена од сите православни, без разлика на нивната национална припадност. Ете, на пример, во бигорското братство имаме еден монах Србин, друг Ром, трет Палестинец, а во моментот имаме и еден искушеник етнички Албанец“, вели архимандритот Партениј.
МПЦ побара Бугарската православна црква да и биде црква-мајка