Дополнителната заменик-министерка во Министерството за внатрешни работи, Славјанка Перовска утрово испратила допис до техничкиот министер Наќе Чулев во врска со возилата кои тој преку телеграма побарал да бидат земени, а се дадени на користење кај техничкиот премиер Оливер Спасовски, претседателот Стево Пендаровски и директорот на Бирото за јавна безбедност, Сашо Тасевски.
Петровска во изјава за Локално потврди дека утрово испратила допис во кој меѓу другото бара и информација со колку возила располага техничкиот министер Чулев. Одговор, заменичката во МВР се уште не добила, а како што неофицијално дознава Локално, се работи за седум возила кои во моментов се на располагање на Наќе Чулев.
„Бев изненадена од телеграмата. На списокот има и возила кои се во редовно користење на претседателот, премиерот и директорот на БЈБ. Се обидов да го прашам дали е недоразбирање, но затоа што не добив одговор од него, пратив допис. Обезбедувањето има свои одговорности кон луѓето. Вакви гафови не се дозволени, се надевам ќе си ја увиди министерот грешката и ќе продолжи министерството да функционира како што треба“, вели дополнителната заменик-министерка за внатрешни работи во изјава за Локално.
Како што вчера објавивме, Чулев донел скандалозна одлука со што се оневозможува нормалното функционирање на обезбедувањето на премиерот Оливер Спасовски.
Александар Тодески