Напад со нож во училиште во Берлин, тешко повредени две девојчиња

Германската полиција соопшти дека две девојчиња се тешко повредени во напад во училиште на југот на Берлин.

Во соопштението наведуваат дека жртвите се девојчиња на возраст од 7 и 8 години, од кои едното е во животна опасност. Полицијата потврди дека 39-годишниот осомничен веднаш бил уапсен во близина на училишниот двор, пишува АП.

Портпаролката на полицијата изјави дека се уште не се јасни околностите за нападот. Не е познато ниту дали напаѓачот им бил познат на учениците.

Регионалната министерка за внатрешни работи Ајрис Спренгер вели дека е „длабоко шокирана“ од настаните во училиштето, потврдувајќи дека девојчињата биле нападнати со нож.